En aragonés: Cronicas d’un lugar (Heraldo Escolar)

«Pero bueno, alavez tu que clase de mayestro yes?», le preguntoron un día a un buen amigo docent. Y no sabió qué decir. Conste que qui le fació a pregunta, un ciudadano leito y informau, teneba buena fe, pero en bell modo le permenó no tener un discurso elaborau, consistent.

O mío amigo me confesó que dende alavez se fa ixa pregunta cada día y no troba una respuesta cool que le proporcione masiaus “likes” en retz. Manimenos, me dició que ha descubierto que i hai dos prencipios que iluminan bella cosa este embolico que tanto se pareixe a o nyudo de Gordias y que emparan o suyo estar educador. Un: l’amor por as cosetas bien feitas. Dos: o sentiu estricto de l’haber de.

Por una parte, o mío amigo creye que ye bueno que os docents nos esmeremos en fer muit bien o nuestro treballo, metendo empeño y tenacidad, deixando-nos l’alma en o nuestro quefer. Y sí, adora desfrutar d’ista fermosa aventura que ye a educación quan aconseguimos dar lo millor de nusatros. Y l’amor. Amar l’amor, porque en la entrega ye a grandeza d’a nuestra forma d’estar en o mundo.

En segundo puesto, me charró de cómo ha tractau siempre de dar eixemplo de treballo, d’esfuerzo. Siempre ha creito, porque l’aprendió d’os suyos mayors, que a nuestra profesión no entiende d’horarios ni calandarios ordinarios. O deber, tant amagau a vegadas, tant a la uembra d’os dreitos. O deber, que tiene valor de valor. Y creye en a suya verdat, porque considera que ye bella cosa que nos dignifica y nos significa.

Ixo le respondió o mío amigo. Sabe que estió una respuesta poco viral, pero sentir-se qüestionau le aduyó a ubrir a finestra y combatir o aerosol d’a desidia. D’o mesmo modo que lo feba Don Antonio, o sensato y responsable mayestro de “Cronicas d’un lugar”, aquella serie de televisión de prencipios d’os 70 que en a Espanya d’o franquismo tardano le fascinó, a ell y a millons d’espanyols, dende a sencillez d’a suya relato. Y yo sinyo o que diz o mío amigo, porque nos pareixemos tanto que dica creyemos estar a mesma persona.

Deja una respuesta

Tu dirección de correo electrónico no será publicada. Los campos obligatorios están marcados con *