En aragonés: «Dezaga d’a pizarra» (Heraldo Escolar)

Fa un anyo escribié sobre deseyos y prochectos. Posibles, conseguibles. Hue recupero la ideya y la meto en o contexto que nos acompanya.
Escribié: “Hue empezipia un curso choven de mochila amplia”. Choven? Mochila amplia? Sí, pero atados a un futuro que nos aspera y no sabemos án.
Escribié: “Los nuestros zentros son un espazio y un momento pa la trobada y soniamos que las nuestras escuelas lo sían pa totz”. Espacio? Trobada? Ni lo mas torpe d’os guionistas d’a pior zinta de serie B. Qué maldita ironía!
Escribié: “Soniamos una escuela bonica, an la belleza sía la man que pillamos pa sentir-nos bien”. Y soniamos, pero hue no la construyimos con abrazos limpios, sino con voluntat de cudiar-nos uns a atros.
Escribié: “Una escuela que nos marabille con o saber, l’arte, la mosica, la poesía, la naturaleza”. Sí, pero buscando camins fa poco desconoixius, ya tristament familiars.
Escribié: “Una escuela tacada de sociedat, an caigan las paretz y nos sintamos tant comodos en as nuestras carreras como en as nuestras aulas”. Unatra pesadilla: fer d’os limites fisicos la nuestra seguranza de vida.
Escribié: “Una escuela d’a creyazión, an nos expresemos con libertat y nos sintamos tant cerca”. Libertat? Zercanía? Será con a mirada semiclandestina, suchetos a la norma que nos limita pa asegurar lo buenpasar.
Y escribié: “Una escuela, no d’a razón, sino d’as razons. En comunidat nos femos preguntas que la vida nos responderá”. Y creyemos en ella, perque la sentimos zerca y nos sostiene l’alma inzierta.
Ixo yera ahiere, ixo ye hue. Y lo mío paragrafo final lo dedico a las mías companyeras, a los míos companyers dozents pa proclamar la mía confianza en o suyo compromiso, lo suyo generosidad, lo suyo esfuerzo, la suya fe sin limites. Y confirmo la simient que sembró lo profeta Joel en o sieglo IV: “Los vuestros fillos y las vuestras fillas profetizarán; los vuestros chovens veyerán visions y los vuestros mayors soniarán sueños”. Profetizemos, pus, las visions que soniamos. Chuntos.

P. S.: Lo titol alude a la cinta d’o mesmo titol, endrezada en 2011 per Jeff Bleckner.

(Este articlo lo escribié en castellán en Heraldo Escolar lo vintiun d’octubre de 2020)

Deja una respuesta

Tu dirección de correo electrónico no será publicada. Los campos obligatorios están marcados con *