Levo un tiempo tratando de contestar cualques preguntas que pueblan as nuestras carreras educativas y abitan as nuestras mentes dozens, maltreitas por a violenzia d’a pandemia. Difizil fayena. Uei, aquí, confieso que, encorralau por a confusión, he optau por intresar-me tan solo por as comunidaz que desarrollan proyeutos globals, porque no i hai pon más robusto que un equipo cohesionado arredol d’una idea de busqueda. Por ixo m’emplego a fondo en conoxer esperenzias que prexinan futuros posibles y afruentan a gravísima fallita sozial que ya esistiba, amplificada con a espansión d’o virus.
Pasó o tiempo d’o esfuerzo en singular, zierto, pero asumamos que vivimos una preocupán tendenzia ta la individualidat y l’individualismo. Isto merma a igualdat d’oportunidaz y aumenta l’isolamiento en as personas y colectivos más vulnerables. Malamén asunto.
Numerosos estudios sobre a realidat educativa chenerada consonan en a importanzia de no dixar sola a la escuela. Ye nezesario creyer-nos que ye un espazio y un momento pa la transformazión, pero ha d’esistir un compromiso compartiu con a soziedat, porque a escuela ye un entorno democratico en o cual convivimos naturalmén y que se puede convertir en “un taller cutiano de vida, an ensayamos alternativas posibles”, en palabras de Marina Garcés, pero nunca en soledat.
Benedetti escribió: “Cuan creyebanos que tenebanos totas as respuestas, de bote y boleyo cambioron totas as preguntas”. Y Cruyff dizió: “Chugar a lo futbol ye mui senzillo, pero chugar a lo futbol d’una forma senzilla ye a coseta más difizil que i hai”. Pa entender a lo sabio holandés abremos de cruzar a frontera d’ixa isla a vezes desierta que ye a valentía y leyer a lo poeta uruguayo ye una invitazión a desembarcar en as plachas d’a inzertidumbre. Totas dos, valentía y inzertidumbre, son nuestras fidels compañeras. Bienvenius a l’apasionán aventura de buscar preguntas amigas pa trobar respuestas compàñeras.
