“Educamos a los nuestros alumnos en o desembolique d’o esprito critico”. Esta frase ye extraita d’una web d’un centro educativo triau a lo azar. Cualsequier profesional d’a educación la sinyaría. Cualsequiera afirmaría que no i hai millor argumento pa trobar-le sentiu a la nuestra fayena que ascuitar la voz d’o alumnado. Y astí empecipia y remata lo misterio. Perque en realidat no lo i hai.
Manuel F. Navas creye que “lo conoixencia ye poderoso, igual que lo pensamiento critico” y se pregunta: “Qué responsabilidat tiene la educación en crear una ciudadanía critica?”. A lo suyo amparo manifestamos la necesidat d’un profesorado tacau de sociedat, que tienga la valentía de trencar muros d’incomprensión y creiga que la suya labor ye, tamién, ubrir-le los uellos a l’aire d’a comunidat a la cuala servimos.
La escuela ye un universo de convivencia y participación en o cual aprendemos a explorar y mantener un esprito de busqueda constant. Perque l’aula tamién ye la sociedat que chuntos construyimos y si creyemos en a ideya que ubre esta columna hemos de desfender la función socializadora, educadora y equitativa d’a escuela.
Astí ye an lo papel d’o docent adquiere tota la suya dimensión, en parolas de Navas: “Las valors han de vivir-se pa aprender-los” y per ixo no lo consideramos como un tecnico aluenyau d’a responsabilidat social, sino como belún capaz d’influyir “pa repensar la democracia”. Perque lo desembolique d’o esprito critico nos leva a la reflexión y, per tanto, a la transformación.
