A bióloga Lynn Margullis nos amuestra que toz os organismos mayors que as bacterias son, de manera intrinseca, comunidaz y que “a vida no conquirió a planeta por medio de combates, sino grazias a la cooperazión”. Por a suya parte, Paco Puche espresa que “a tendenzia fundamental en a dinamica d’a vida ye a cooperazión universal”. Fren a istas uelladas eticamén lempedas, o mandau d’a competenzia individualista escabona a idea d’o bien común y s’enalteix en a economía, en o esporte y en o treballo.
Kropotkin fabló de cooperazión, solidaridat, cudiau mutuo y reparto chusto de recursos como ferramientas clau ta lo progreso d’a soziedat. Muitos siñamos istos prenzipios pero vivimos malos tiempos ta “ethos” y en els a escuela lo tiene mui difizil ta desarrollar prozesos de construzión ziudadana cuan bels liders sozials, esportivos y politicos defienden a legalidat por alto d’ella.
Uei, a educazión quiere presentar-se como una actividat esenzialmén etica y ta ixo ha de considerar tres dimensions: Antropoética, ta descubrir as relazions más chustas entre comunidaz, o que implica un humanismo etico; Bioética, ta esplorar relazions más responsables d’a espezie con a Biosfera; y Ecoética, ta asercar-nos a una relazión más equilibrada d’a espezie umana con os diversos sectors d’a Ecosfera. Asinas lo defiende José Domínguez y con él alcordamos, sin comisions, que sí i hai futuro si somos capazes de navegar a bordo d’o compromiso moral.