Torno a casa dimpués d’asistir a la proyezión d’un documental en a Facultat d’Educazión de Zaragoza y cuan me siento en o mío sillón favorito he de secutir-me o polvo d’os míos zapatos. Ye estraño, pus no he pisau tierra, pero a mía ropa aculle l’aroma d’as carreras d’o mío bario Oliver, en os míos uellos agún brilla a luz d’o sol d’o suyo tardada, a mía memoria acarizía o paisache d’as vozes d’os ninos.
Orencio Boix, director d’o proyeuto, nos recuerda que documental y dozenzia comparten etimolochía: “docere”, mostrar, mesmo amostrar. Ye verdat, como lo ye que Oliver, sin amprar radiz semantica, ye sinonimo de crexer, construyir, convivir.
O tren estió entre dezenios frontera que uniba y deseparaba o bario. A vía, a razón a partir d’a cuala naxeban y moriban as mil formas de sentir a vida. Uei, un corredor verde cubre os suenios de qui viacheamos en aquels vagons ruidosos y torpes que nos levaban a Valencia a beber-nos l’aroma d’o mar y cunar-nos en as ondas d’a suya mosica.
Zincuanta años dimpués o viache contina. Sigue abendo ninos asperando o tren, como en o docu d’Ignacio Agüero, pero agora qui traviesa o bario no ye una maquina sin alma sino un relato enamorau. “As clases”, que asinas se diz ixe poema inacabau que emoziona por a suya limpieza, ye pura flama porque asinas lo quieren as vozes d’os ninos y ninas d’o CEIP Ramiro Soláns. Os suyos fotogramas son brilos de comunidat acarrazata a la igualdat y a suya mosica se chita en a riqueza d’a suya diversidat.
Cada palabra alcanza un significau y anque as mascarillas s’empeñoran en ocultar a emozión d’a trobada, a lo espectador le plega un mandau que ye unico porque ye multiple: os abitador d’iste ecosistema heterógeneo han edificau una atmosfera de convivenzia en a cuala ye posible aprender.
Ya ye tarde. Zarro os uellos y me veigo a yo mesmo chugando a lo futbol en “os campos d’o Luis”, os mesmos sobre os cuals palpita iste choven corazón que no entiende de clases, que ye vía d’emanzipazión.
