Una d’as claus pa la millora educativa ye l’adreza escolar. Qui emos viviu u viviz ista esperenzia sabemos que ta que un proyeuto directivo s’amane a lo esito ye fundamental fomentar a partizipazión d’a comunidat, sobre tot d’o claustro. Ye dezir, propiziar l’autonomía pa enchegar iniziativas y escuitar as suyas nezesidaz y propuestas, precurando o suyo buen termin.
En bella ocasión una persona recordó en publico que en a suya primera visita a lo nuestro zentro le ebanos dito: “Aquí cudiamos a la chen”. Y en ixe “cudiamos” iban implizitas ideas como fazilitar o desembolique personal y profesional. “Qué ye o que amenestes?», preguntabanos pa asinas presentar o liderazgo compartiu y precurar que as cosetas ocurrisen, que se fese realidat o que plantiaba qui s’entrega a lo bien común.
En iste ecosistema de conoixenzia distribuyiu os equipos d’adreza transmiten un mandau de confianza entre o profesorado de traza que iste s’empodere pa implementar proyeutos que encaxen en a comunidat educativa. Isto rebaila un cambio de cultura d’adreza d’os zentros, cambio que ya se da en atros ambitos como a metodolochía u o desembolique pedagochico a traviés de programas instituzionals y formulas de conoixenzia mutuo. O suyo esito nos convida a tresladar-las a lo territorio directivo, tan amenestiu de rez de cooperazión y conisions profesionals.
En atros momentos he escrito sobre ixa ribera posible que son os equipos directivos y he alabau o suyo compromiso y bogalería en tiempos achitaus, de garmos imposibles y ondas incalculadas. Uei, amás, prenso en a creyazión d’espazios de reflesión y d’enfortimiento d’a formazión ya existén, porque amás de dixar-se l’alma cuan analisan situazions, lideran prozesos, atienden con amor a las familias, aproveitan recursos y acullen a lo viajero, merexen a compañía d’a soziedat a la cuala sirven. Y tot ixo, estando iguals con os suyos iguals.
