
Ya tenemos o documento que pretende contribuyir a modelar a profesión dozén. Organizau arredol d’a formazión inizial y permanén, azeso a la profesión, espezialidaz y desembolique profesional, trata de responder a lo espolón istorico de disposar d’un estatuto dozén. Manimenos, caldrá afrontar un camino jalonado por innombrables posadas en as cualas trobar-nos y compartir as aventuras que o viache nos regalará.

En as suyas estanzias fablaremos d’ixas prebas espezificas d’azeso en as cualas tan importans serán a competenzia comunicativa y o razonamiento lochico-matematico. Consideraremos a razón d’as actituz y competenzias y nos trobaremos con más asignaturas sobre didática. Nos fablarán d’un sistema dual de formazión y nos convidarán a abordar as dimensions dozens en un entorno de formazión permanén.
No faltará a referenzia a la competenzia dichital d’o profesorado y se reprendrá a implantazión d’un Prozeso d’Iniziazión a la Dozenzia, espiello d’o MIR. Asinas, cobra forza a idea de periodos practicos tutorizados y se recuerda que os temarios son obsoletos y cal crear filtros entre cuerpos profesionals.
Autualizar as espezialidaz y incluyir formulas d’avaluazión d’o desempeño d’a funzión dozén son atros dos asuntos sustanciosos que prometen debates d’altura.
Leo entre linias y creigo que se fabla de trobar-le sentiu a la nuestra labor a traviés d’a voz de l’alumnado. Porque amenestemos una escuela tacata de soziedat, que as creaturas se sientan comodas en as nuestras carreras y aulas. Que os mayors deseyen venir a la nuestra casa a compartir os suyos suenios.
O profesorado esplicamos a nuestra vida a traviés de l’amor a lo que femos chunto a los nuestros iguals, o nuestro alumnado, as nuestras familias, pus lo unico que podemos amostrar a lo mundo ye a zerteza de no tener zertezas. Y sentir que a nuestra vida nomás tiene significau si la vivimos en comunidat. Asinas entiendo isto d’estar dozén.