Ye dezidiu: a “superazión personal”, o/o “esito personal” y l’acumulazión de “meritos” son as alfayas d’a corona. A individualizazión ye una verdat absoluta que impide que atros rayos de luz pleguen dica nusatros y pretende alexar-nos de valors relacionales y colectivos.
Cualques ideas prosimas a lo trunfo de l’individuo por alto de l’abanz como soziedat trunfan a costa de marcar diferenzias entre una escuela ta febles y una escuela ta poderosos. D’iste modo ye más difizil que determinatas personas que provienen d’entornos desfavorecidos alcanzen o bienestar, pus enfoques como l’aprendizache cooperativo, a diversidat u o creximiento en entornos criticos no conseguen ubrir-se trango enmeyo d’una enreligo meritocrática d’imposible transito.
A inclusión, prenzipio esenzial vinculau a los dreitos umanos/umans, sofre l’enresto d’ideolochías clasistas que pretenden convenzer a lo común d’a importanzia d’estriar a los individuos a partir d’as suyas capazidaz. Se crea asinas una irreversible breca entre capazes y incapazes.
Se trata d’un discurso segregador que aposta con fuerza por siñalar a lo diferén, indicando-le itinerarios distintos y siempre distans. Se fortalexe a escuela excloén que clasifica a l’alumnado en perchudizio d’o feble porque o suyo orichen, a suya identidat, o suyo ritmo d’aprendizache y os suyos resultaus academicos no son “normals”.
Somos en un momento en que caler preguntar-se por o futuro, preocupaus por a vichenzia de modelos contrarios a la universilización d’a educazión. Ixos plantiamientos niegan a esenzia d’una educazión emancipadora capaz d’ofrexer a lo que más l’ameneste, a lo que vive situazions d’abandono y fracaso estructural a posibilidat de trobar caminos d’oportunidat chunto a los suyos iguals. Si asumimos o nuestro compromiso sozial y colectivo adubiremos responder a qui más ameneste que se faiga realidat a idea que defiende Albano D’Alonso: “Tu sí vales, tu tamién”.
