(Publicau en Heraldo Escolar, 10 de febrero de 2021)
Icíar Bolláin le metió alma y piel a Victoria Subirana a traviés de Leia, una muller ideyalista que se va a Nepal con o suyo goyo de vivir y a suya pasión por a educazión por tot paramento. Lo fazió en “Katmandú, un espiello en o zielo”. Allí vive Sharmila, mayestra local y luego perfecta aliada. Manimenos a realidat de Nepal no aduya. Sharmila vive en armonía con Laia pero no comparte a ruptura con a tradizión: “Aquí cadagún tiene o suyo puesto y o suyo destín en a vida. Mesmo os parias”. Nomás l’amanamiento entre toz dos mundos a traviés d’o conoixenzia mutuo ferá posible rozar o suyo suenio con os didos d’o corazón.
A educazión ye un prozeso construyiu en soziedat y que tiene un aro istorico y pa interpretar a suya naturaleza emos de conoxer o momento con que convive y o proyeuto de soziedat en que grillona. Asinas, pa entender a escuela de uei y mañanada amenestemos conoxer o suyo pasau.
Podríanos fablar d’Istoria d’a Educazión, que no sería malamén, pero uei escribo sobre ixa istoria d’os zentros en ocasions oculta, a vezes no recontada, porque quiero meter en valor o pasau d’as comunidaz educativas. D’iste modo se fa más amable o camino a lo compromiso y a lo proyeuto común.
Os zentros que consideran que o suyo pasau ye patrimonio d’a comunidat fazilitan a encorporazión de voluntaz fertils. Contar con una cronica d’o zentro u un fondo documental d’os feitos más relevans son iniziativas inclusivas que enamplan l’acullida y propizian contar con un mandau de comunidat con respuestas a cualques preguntas. Quí y cómo yes? Dó y para quí yes? Y sobre tot: por qué yes?
Ye, en fin, o que se conoxe como “culturas d’a escuela”, un enfoque que estimula l’intrés por a memoria y o patrimonio escolar “con una clara tendenzia endrezada a lo ‘micro’ y lo interno” (López Martín), un nutrién d’a narrazión que fa d’a escuela un espazio sozial cusiu a una cultura propia. Laia l’entendió cuan se tacó de soziedat.