Aprender, creixer, convivir (Heraldo Escolar)

(Publiqué este articlo en Heraldo Escolar lo mierques, 26 de setiembre de 2018)

   Un congreso (d’innovación educativa) ye puesto d’aprender, puesto de creixer, momento de convivir. En ell las parolas se convierten en navíos que navegan mars interminables y a bordo d’ells vivimos experiencias pa reflexionar.

   Lo pasau cabo de semana se celebró en Zaragoza l’II Congreso Internacional d’Innovación Educativa y si bien ya s’han presentau las conclusions que conforman y confirman una firme voluntat de transformación, proposo las opinions y impresions d’un asistent que lo vivió dende adintro.

   La exquisita organización estió fruto d’o esfuerzo d’un magnifico equipo formau per las Adrezas Chenerals d’Innovación y de Formación. Se cudioron totz los detalles y se fació buena la ideya de cudiar a la comunidat.

   Subrayo la sensibilidat d’a mirada artistica en l’acto inaugural y comparto l’encierto en a esleción d’os temas centrals, como asinas comprebé charrando con decenas de congresistas. La emoción en l’aprendizache (Mar Romera), la transformación d’espacios (Rosan Bosch) y la innovación educativa (Alfredo Hernando) entre atras y atros commovioron a lo auditorio y sobatioron las claus d’o debat.

   Un aconsigo estió tamién la simultaneidad de propuestas. Se desenvolvioron a la vegada ponencias semiplenarias, tallers y experiencias de centro. Distingo per lo suyo calidez las experiencias en as qualas participoron chuntos profesorado, alumnado y familias, muestra que la ideya de comunidat educativa ye razón de futuro.

   Per zaguer, subrayo l’acción “Visual Thinking”, con uns documentos que reflectoron lo esprito d’os ambitos visitaus en un imachinativo exercicio de sintesi.

   Con as luces amortadas, lo luns las aulas tornoron a brilar a la calor d’a pasión per la educación.

Deja una respuesta

Tu dirección de correo electrónico no será publicada. Los campos obligatorios están marcados con *